historias pequeñas

 

NOCHE TRISTE DE NAVIDAD

(Inspirada en un hecho real ocurrido en los años cuarenta

Del pasado siglo)

 

La madri bregandu en casa,

 y a la lumbri, en un puchero,

giervin güesus de una cabra,

pa jacel un caldu aluego

que con presah de barbáh,

y el requesón que había jechu

con miel y unuh chicharronih,

jarian de la Nochibuena

 una nochi pal recuerdo

 

¡ Pero el muchachu no ha gueltu ¡

Tú le riñisti  ayer

Y le sacuihti un muehcu

Pol no aprovechar la tardi

Y presentarsi tempranu

Con el cabrial pal pueblu,

No probó bocau cenandu

Y enfurruhcau se jué al lechu,

 

El día ehtaba mu fríu

La nochi vieni con yelu, 

hay que irsi ya pal pueblu,

 que las cabras ya tuvierun

tiempo cumpliu de sobra

para andar esas callejah

y zarzalear los güertuh

 la Galana no la encuentru

ni a la chivarrina rucia

ni a la del betijo negro.

 

Lah ehtrellah, poco a poco,

Se van repartiendu el cielo

Y la nochi ojcura y fría

Clava aguijonih de yelu

 

Sultana miraba inquieta

Del amu el desasosiegu,

Más que “Carea”, su hermana,

Juntuh dehdi que nacierun

Se miraban y sabían lo que

Se ehtaban diciendo

 

Se meti la nochi encima

il pal pueblu no podemuh

Ehtá a mah de media legua

(Y mirandu a la Sultana):

Perderíamos toah lah cabrah

En boca del lobu fieru

Y mi padri, tira a tira,

Me desollaría el pelleju.

A la Güerta laj Jerrumbrih,

No han veníu con las cabrah,

Ehti añu loh cabreruh,

La caseta está demáh

Y corral que tiene es güenu

 

En el reloj de la plaza

Laj segundaj  ochu dierun.

¡ Mira que el zagal no ha vueltu!

Y no es hora que lah cabrah

 andin antovía paciendu

Llama al Compadri y a Chenchu

Dihpón que lo buhquin prehtu!

 

Juerun saliendu a la calli

Al toqui del reloj sueltu,

Hombih, mujerih y mozuh,

con linternas encendíaah

temblandu la llama adentru,

y a partir se dihpusierun

 

Buhcarun por lah callejah,

Por lah suertih, por loh cerruuh,

Registrarun loh tinauh,

Las casetah de loh güertuh,

Las talleras y lah cuevah

jechah en el canchu mesmo.

 

¡Miguel…!!! Gritaban a vocih

Por loh ahperuh cabezuh,

Tejón, Lobosa, La Aceña,

¡ respondía  sólu el eco.!

El Alagón que rugía

Cercano, potente y fieru

ahogaba todah lah vocih

que la nochi le trujerun

 

Cuandu bajan  por  La Gama,

Lati una perra a lo lejuh.

La perra sigiuó ladrandu

Y alertó a loh mah lanteruh,

que na más guipal el jumu

A la caseta se juerun

 

La puerta ehtaba atahcá

De una patá La rompierun.

Jumeaba un jaci e bálagu,

Delanti, el muchachu muerto,

Encorujau trah la puerta

Que no pudu abrir por drentu.

 

Aún la lumbri traicionera

Jacía jumuh en su cuerpo

Un mozu le echó una manta

Y a una burra lo subierun ,

Y Con la perra llorandu

Lo trajerun hasta el pueblo.

 

Al toqui alegri del Gallu

Anunciando el Nacimiento,

Siguió un duelu de campana

Que encogió el alma y el cuerpo

 jizu temblar lah entrañah

 de loh jombrih mah severuh

 

Esta nochi en el Portal

Estrenan un pahtor nuevu

El Niño le sonreía….

Lah Doci en la Plaza dierun.

 

Juan e. Sánchez Calle (Febrero 2010)